حاج ملاباسم کربلايی

ليلة 10 شهر محرم الحرام 1440 هـ

 قصيدة: نوم العوافي أداء: الحاج باسم الكربلائي

 كلمات: الشاعر ميرزا عادل أشكناني

 المكان: هيئة شباب الأكبر (ع) - لندن

عالرمح يوليدي غافي

نايم ابنوم العوافي

🔸🔸🔸🔸🔸

يطير الجنّه لاچن عالرمح يختار عِشّه

صَـمِّ ارماد آمالي اْو هَوَه افراگك يطشّه

ابدمع عيني اريدن ثغرك اليابس أرشّه

لوَن بيدي اشلَعِت گلبي اْو حدْر جسمك أفرْشه

ياللي مو طبعك تجافي

نايم ابنوم العوافي

🔸🔸🔸🔸🔸

گلبك منفطر من الظمه اسم الله عله گلبك

عَله اذراع الأبو اترفرف إديك او تگظي نَحبك

اشتطلب حرمله ها يالولد و اهوَه اشيطلبك

حتى ابسهم المثلّث وسط نحرك يصوْبَـك

و انرمه ابسهمك شِغافي

نايم ابنوم العوافي

🔸🔸🔸🔸🔸

مشيت اوْيه السبّايه او راسك اگبالي ألِمْحه

اْو شيّال الرمح متعمّد اگبالي يِلَـوْحه

راسك گوّه يا عبدالله ثابت فوگ رُمحه

و اخاف امْن الهوَه لو يعصِف ايْحَركه اْو يطيْحه

راسك ايطوف الفيافي

نايم ابنوم العوافي

🔸🔸🔸🔸🔸

يمن طولك غصِن ما خضّر اْو راح امن اديّه

و انته ابضحتك تارس چنِت بيتي عليَّه

نايم مبتسِم يبني اْو عسه النومه هنيَّه

راسك عالرماح او جسمك ابحضن الزچيه

كافي تمرد گلبي كافي

نايم ابنوم العوافي

🔸🔸🔸🔸🔸

أهِز مهدك و اصير اتخيَّلك نِمْتِ اعله طوله

أنوح اْو خل تلوم اللّايِمه اْو تحچي العَذُوله

أكابر بيش اكابر يا ورِد مات ابذبُوله

اْو كلهن بيّه : اُم اْو فاجْده اْو وَلهىٰ اْو ثكوله

ماتت الضحكه ابشفافي

نايم ابنوم العوافي

🔸🔸🔸🔸🔸

بعدك ما صرت گمره او وِسَف ذبحوْا هِلالك

يغافي اعْله الرمح چنَّه الوضع يبني حِلالك

يمر بيك الهوَه و النَّسْمه تخجَل من دَلالك

يلاعب شَعرك او ضايف جَمالِ إعْله جَمالك

شعرَك اتحركه السَّوافي

نايم ابنوم العوافي

صوت : محرم 1440 - نوم العوافي

ویدیو : محرم 1440 - نوم العوافي