حاج ملاباسم کربلايی

قصيدة [ ما ندري ]

 أداء: الحاج باسم الكربلائي 

كلمات: الشاعر ميرزا عادل أشكناني

دماء الحُسين النازفة , ما بين رمال كربلاء الحارقة , وبين ما نقلته حوافر الخيل و هي تجول من صدره إلى مخيِّمه , بين ما لطَّخ به الغراب جناحه وهو يتوجّه إلى فاطمة العليلة , وما خفي أعظم ! ... فليت شعري إذا نزل رسول الله بالقاروة الخضراء مع ابنته الصدِّيقة الطاهرة من أي دمٍ سيجمعون ؟ 

ما ندري مِن يا دِمه     

ظلَّت تِـلِـمْ فاطمه

و اِدمومه متوزِّعه   

بين الأرض و السِّمه

🍂🍂🍂🍂🍂

نِزَف دمِّ أبو اليمَّه بالغاضريَّه

أثاري الأثر بالثَّرىٰ اْو بالثُريَّه

جزُء حِنَّه صار ابْچُفوف الزچَيَّه

اْو جزء للخيَم شالته الأعوجيّه

من جالت اعله الصدُر   

طـشِّ الدِّمه ابكل كتُر

ياهو الذي ايْجمّعه    

بين الأرِض و السِّمه

🍂🍂🍂🍂🍂

السَّهم من فتَك بالگلب يا هظيمه

تِرس چفَّه و ابدمَّه خضَّب كريمه

المُهر للخيم رَد يخبِّر حَريمه

يزينب دَگومي الظلِيمه الظلِيمه

امْن الخيمه طِلْعَت تضِج   

شافت دمه اعله السِّرِج

اْو صوت المُهر نسمَعه    

بين الأرِض و السِّمه

🍂🍂🍂🍂🍂

قمِيصه اِنْسِلَب و ابقميصه اشكثر دمْ

اْو بقايا ثيابه اعله جيش اِتِّـقسَّم

اِلْعِـمَامه أصبحَت عِد مَـنَ اللهُ أعلم

اِغسلوْا دمها لو لا عليها الدِّمه تَمْ ؟

دمَّه الجره اعْله الدِّرِع   

اْو دم خنْصُره المنگِطِع

بيْه نزْلَتِ الواقعه      

بين الأرِض و السِّمه

🍂🍂🍂🍂🍂

ارتِفَع راسه و الدَّم يسيل ابرماحه

و إجت سِكنه تصبغ شعرها ابجراحه

مثِلها الغـُراب اللي مَـرَّغ جناحه

اْو گِصد للعليله ابنحيب اْو مَناحه

جابْ إلها صوغة سفَر    

بجْناحه دمِّ النَحَر

ظل ينقل الفاجعه    

بين الأرِض و السِّمه

🍂🍂🍂🍂🍂

نِزَل جدَّه و إبإيده قارُوره خضره

جمَع بيها دمِّ اللي حزّوله نَحره

صِعَد و السِّمه طاحت اعْليها قطره

ابسببها ابغروب الشِّمس شفنه حُمره

ابْحِرگه الزچيَّه اصْرَختْ   

بدمَّه الوجِه لطِّخَت

و اتعاينِ لْـمَصرَعه   

بين الأرض و السِّمه

صوت : 1440 - ما ندري

ویدیو : 1440 - ما ندري