حاج ملاباسم کربلايی

قصيدة : يامصحف ماساتي

للشاعر : ميرزا عادل اشكناني

المناسبة : ليلة ١٨ محرم ١٤٤٠هـ

يا مُصحَف مأساتي  أقراك اِبْآهاتي

شِفتَك آية همِّي  بأبي أنتَ وَأمِّي

يحسين اْو كِل سُوره تِعْكِسْ للطفْ صُوره

صحْت ابدمعي اْو دمِّي  بأبي أنتَ وَأمِّي

🔸🔸🔸🔸🔸

ربنه ابْمُصحفه المُنزَل

قصَّة مصرَعَكْ أنزَل

قسَّمها اِعْله آيات اْو سُوَر تروي الرزيَّه

كلما أفتَح المُصحَف

أنظر مشهدِ اِمْن الطَّف

مِنِّ اِلجِلده للجِلده أشوف الغاضريَّه

اِقْريت ( الفاتحه ) ابنُوحي

يالفاتِح جرِح رُوحي

لجْل الـ( قُل هُوَه ) جسمَك هُوَه فوگ الوطيّه

اِعليكِ ( الطـُّور ) اِتفسَّر

و ابدمعاته استَفسَر

هذا ( الطارِق ) مرمي؟

لو سورَة ( و النَّجْمِ ) ؟

اْو ( ياسين ) ابهالوادي

بِسْمَك گام اِيْنادي

يا قرآني المدمي

بأبي أنتَ وَأمِّي

🔸🔸🔸🔸🔸

يـ( المِزَّمِّل ) ابدمَّك

يـ ( المدَّثِّر ) اِبعزمَك 

رغْم ( النازِعات ) اللي اسْلبُوا منّك رداءك

من أقره ابـ( قَصَص ) صَبْرك

أتذكر غـُـصَص صدرَك

واِمْن أقره ( النِّسَاء ) أذكر عله الهزِّل نساءك

راحَن بالسَّبي اْويه الگوم

چَنهِن من سبايه ( الرُّوم )

ابْنيران ( الشِّمس ) والعسكر ايفرهِـد خِباءَك

چَـم طفله ابهالهيمه

فرَّت من الخيمه

و اتنادي يا هـظمي

تِچْوي النار ابْجَدمي

( بالدّخّـان ) أتذكّــر

حرْگ اِخيام الخِدَّرْ

اتناديك إطفي اِخْيّمي

بأبي أنتَ و أمي

🔸🔸🔸🔸🔸

يَمْبَچِّي ( القلَم )و ( النَّون )

و ( الجِّنْ ) گامَوْا اِيوِنَّونْ

اِدموعي (المُرسلات) بهالرزيَّه اِمْن احچي بيها

أحچي ابسورة ( الشُّورَى )

لو خلِّيها مستوره

و ( المُمْتحْنه ) لولا الشورىٰ ما ذِبْحَوْا بَنيها

متجمعه ( الزُمَر ) ضِدَّك

و إنته اعِله التُرُب خدَّك

عَشْرَه ( العادِياتِ ) اْو جثّـتَـك سِحْگوْا عليها

چن زينب گِـدَّامَك

تسمَع طگِّ اِعظامَك

اتصيح ابْدَمْعِ اليِهْمي

فدوَه لعظمَك عظمي

خويه ابعيني اْو شفتَك

الخيل اتگلّب جِثتَك

داسَوْا سوري المَحْمي

بأبي أنتَ و أمّي

🔸🔸🔸🔸🔸

من أقره ( القَمَر ) أنْحَب

أتذكّر گُمَر زينب

و اذكر حَمْلِته عالمَشرعه اِمْن أقره ( القِيَامه )

يومَه ( الواقِعه ) اْو حَلَّت

سيفه ( القارِعه ) اْو نِزْلَتْ

سوَّه ( الزِلزله ) ابْطف كربله مِن شَد لِثامَه

ناره البالحُرُب وَجهَه

يوم اللّي ( عَبَس ) وجْهَه

وحصانه ( الرَّعَد ) واْعليه لِكد شاهر حُسامه

ضهْضب سيفه اْو دَمْدَمْ

غيمه اْو تمِطرْ بالدَمْ

صاح آنه المِتْسَمَّي

راعي الغيره النّشمي

و اِتْلَفَّتْ لِعْضِيده

گلّه اِمْن ألْزَم صَيده

أذبح و إنته اتسمَّي

بأبي أنتَ و أمّي

🔸🔸🔸🔸🔸

سورة ( طه )تتكرَّر

من صورة علي الأكبَر

الـ(نور) اللي ابْـ(مُحمَّد) كلِّه مجموع ابأصُوله

و اشما أقره بـ( السَّجده )

أذكر سجْدِتَك عنِده

جاعل خدَّكِ اِبْخدَّه اْو تِمدَّدْت اِعله طوله

اِسهامه ( الجاثيه ) ابصدره

اِسيوفه ( الغاشيه ) ابنحره    

وعن باقي ( الشَّرِح )عاجزِ و لا أگدر أگوله

حچْيِ ( الشُّعَرَا ) أگصَر

من أنْ يِرْثي الأكبر

ناداك اِحضر يمِّي

وإجمَع بيدك جِسمي

فگْد إِبنَك يوم الطًّف

ما مُمكن يتوَصَّفْ

لاچِن إِقبَل نَظمي

بِأبِي أنتَ و أمَّي

🔸🔸🔸🔸🔸

( الكوثَر ) و ( النَّبأ ) يبچونْ

لِبْنِ ( التِّينِ )و( الزَّيتونْ )

اِمْعوَّذ بـ(الفَلَقْ) نجْل الحَسَن للحومه يِنْزَفْ

چانت ( مائِدَة ) عِرسه

سيفه اْو لامِتَه اْو تِرْسه

اِعليْه (الكافِرُون)(اتِكاثِرَوْا) صَفْ يِتْبَع (الصَّفْ)

ثوب لْعِرسه ما فصَّلْ

اِعليْه ( الذَّاريَات ) أجمل

جاسم ( فُصِّلَتْ ) أچفانه و ابْدمَّه ( تِزَخْرَفْ )

و ( الفجْر ) البِعْيُونه

و( اللّيل ) اِعْله اِمتونه

يسطَع نوره اْو يِعْمِي

و اِعْليْـه اِنهَد عزمي  

من طاح اِعله الغبره

و الطّبره اِعله الطبره

صاح أدْرِكني يَعمِّي

بأبي أنتَ و أمّي

🔸🔸🔸🔸🔸

( هُود ) اْو ( يونِس ) ابْحَسره

( نُوح )و ( يوسف ) اْبعَبره

اْو باقي ( الأنبياء ) اتْهِل دمعها ابهالفجيعه

و ابحِزْنه النبي ( إبراهِيم )

حگّه اِبهالبراري ايهِيم

ما شايف أبو ذِبْحَوْا عله صدره رضيعه

طفلك يكسِر الخاطر

سهْمَه المُهْجِتَك ( فاطِر )

ابنبلة حرمله اِوْليدك تروَّه مِن نجيعه

من سَهْم اللّي ابْجِيده

گام اِيْفَـرْفِـح بيده

ناداك إشلَع سَهْمي

غارگ بالدَّم نَجْمي    

مذبوح ابچـفّـيـنك

يحسين الله ايْعينك

يمسبِّب كِل غمِّي

بأبي أنتَ و امي

صوت : محرم 1440 - يامصحف مأساتي

ویدیو : محرم 1440 - يامصحف مأساتي